Ja, waat is daat vur ennen titel, vrogde ow misschien waal af. Daat zit zoë…Ge het in de afgeloëpe waeke in ut Krukkeneejs kunne laeze, daat enne gas Krukke de mtb tocht Bartje200 in ut Drentse land zujje gaon fietsen…jao, ge lèst ut good….zujje gaon fietsen. Afgeloëpe weekend waas ut zò wiet. Vriedaagmiddag haaje ze zich beej mekaar geraapt, en ware op weg gegaon nao Drenthe. Ze haaje en huuske gehuurd, zoëdaat ze s merges ni in alle vroegte, nag di kant op moste. ’s Aovus nag lekker gegaete dao, fleenk gespaaid, want 200 km Mtb-en, dao hedde waat brandstof vur nuedig. De stemming zaot dur good in. Ma daat woord anders… Ten iërste waas dun temperatuur in ur Airbnb huuske, en alt, muf, bedômpt hok, door de hets vaan de afgeloëpe waek, um kapot te gaon. Heit, zwiëte, last vaan oksel- en kruisdampen en ok nag is ut gesnörk en gezaag, vaan owe kamergenoot, din de slaop tussendoor waal kos pakke. Ma good, daat waas nag dao aan toe, want ‘s nachts waare de streng gereformeerde waergoden in Drenthe, en nou druk ik meej nagaal mild oet, iets minder good gestemd, as de katholieke in ut Noorde van Limburg. Ut ging biëstig tekiêr dao, hagel, raegen, störm, waèrlichte, onwaèr en ik wiët ni, waat allemaol nag mier. Code zwaart. Toen beej ut krieke vaan dun daag, licht, de duusternis verdreef, woord de inmiddels herstelde stilte in ut huuske bruut verstoord, door enne vloek, vaan de Pittbul (en di kaan vloeke). Heej haai op zienen tillefoon en melding gekregen, daat Bartje 200 door ut noëdwaer en de aangerichte schade aan ut parcours, afgelast woord en de deelnemers vriendelijk, doch dringend verzocht woorte, um ni nao de startplaats te kome. Ut parcours waas te slecht en gevaorlijk. Ut leek waal en slachtveld. Onverantwoord, dus.
Naodaat de graafstemming, inmiddels ontstaon, en bitje getemperd waas, woord beslaote, dur toch nag ma ut beste vaan te make en de fietse wer op de wage te laaje en en moei tochtje op de Veluwe te make, woh de waergode gunstiger gezind ware gewest. Ut waas nag 35 grade en nao 70 km, kwaom ut gezelschap toch tot de conclusie, hoe ze mit dees temperature in godsnaam die 200km haaje motte voltooie. Ik heb vernaome, daat dur alwer planne zien gemaakt, um in 2027 en neeje poging te wage.
Verder wil ik ut kort halde. De diverse pelotons vaan de Krukke ginge op de werme zondaagmerge op verschillende weendstreke aan, um heer of dao de koffie en gebak te nuttige, um nao afloëp op deze vaderdaag beej de Grijze Tapman, nag vaan en extra pilske te geniete. Op vaderdaag mog daat vaan Mooder de vrouw.