Deze zondaag haai ik meej aangeslaote beej de B groep. Oërzaak waas ni, daat ik de A’s nimmer kaan volge, of daat dur en kwòj wôrd is gevalle. Neh, ik haai gister aal mit en gruupke en “klein rundje” gefietst. Dun baôg kaan ni aalt gespanne staon. s’Merges toch ma efkes permissie gevrogt beej de Opper Bé. De grötste vaan ut gezelschap, Obelisk. Ma…gen antwoord. Bleek, daat ie mit de Pitbull VIP kaarte haaj gescoord vur de Amstel Gold Race. Ze haaje dun daag vaan ur laeve. De gansen daag stong de Krukkeapp vol vaan fotoos en filmkes vaan eur avonture. In dun auto beej de koersdirecteur, de koers volgend op de iërste reej. Ma ut hoëgtepunt van de dag vur Obelisk, en meet and greet mit Jan Janssen (foto rechs), Neerlands iërste tourwinnaar in 1968. Tevens dun bouwer vaan Obelisk ziene fiets, ma daat waas inmiddels ok alwer ongeveer 32 jaor geleeje.
Dus, de gok genaome.
Ja en as ge ow beej daat B-gruupke en bitje aimabel opstelt, ze op lastige momente oet de weend halt, da komde dao en hiël end. Wuurde zelfs geaccepteerd. En daat is vur meej as boëtendörpse (lees: vaan de Mèlderse) aal hiël waat.
Rundje Boekel, koffie beej de café “ut Menneke”, beej de Krukke baeter bekend aas de Kökskestrommel. Midde in ut centrum vaan Boekel. Sinds meenseheugenis aal en pauzeplaats vur ut Krukkepeloton. En kroeg, woh dun tiëd het stilgestaon. Zit ut aas Café de Grijze Tapman, ma da nag 50 jaor alder, dus da kunde dur ow waat beej veurstelle. Achter ut buffet, volges meej nag dun iërsten oetbater, oet dun tiëd daat en glaas beer nag bekânt enne gulde koste. Zien gezicht zuut dur waat afgelaeft oet. Hoe zal ik eum umschrieve?: “Café de Wolk, de eigenaar zatter as ut volk”. Daat sort. Gebak, kunde dur ni kriege. Traditiegetrouw wuurd de kökskestrommel op de taffel gezatte, onder ut motto, graai toe. Daat doon we daan ok, want achteraf waas de trommel zò good aas laeg. Maot en fatsoen, dao zien die B’s ni zò good in. Verder gewoën en goj tas koffie, zonder toeters en belle. Taegewôrrig mot dur ok vort aalt ennen dikke bonbon en en likeurtje mit slagroom beej zitte. Zeker lekker, ma di flauwekeul wuurd aalzelaeve fleenk op de raekening gezatte. Onder de pauze, kwaom ut gesprek op afvalle en minder kilo’s en toen woord duudelijk daat vur sommige persoëne dun term “duur” waat verwaarend waas. PI air Rebellin refereerde dun term “duur” aan ennen deure (dure) fiets, d(e)ure breel, d(e)ure scheuntjes, zelfs en d(e)ure vrouw. Jao, ik wiët ut, op zien Hôrsters is ut “deur”. Ma Rebellin is da ok genne echten Hôrsterse. Ut kos um ni “duur” genog zien, ma kilo’s veel ie dur ni mej af. Toen um duudelijk gemaakt woord, daat dáát dur niks mej te make haaj, daat ‘duur’ gewoën beteikende, daat ge veul oore op din “dure” fiets mos zitte, um de kilo’s kwiët te waere, realiseerde heej zich bliekbaar, daat ie zich veul geld in de tès haaj kunne halde, um zien doel te bereike.
Net vur ut vertrek mos ik nag efkes nao ut huuske (de wc). En ik mende zeker daat Jerommeke naeve meej stong te klatere. Ik kiek rechts naeve meej, krèk aover ut schotje hin, gen Jerommeke, ma kiek 2 schotte wier, taege de kop vaan en andere Kruk aan. Toch huur Jerommeke waal praote. Waat bliekt, schot te hoëg? Neh, Jerôm te liêg.
Terug aan de Miëterik, woord ik aal drèk aan de jas getrokke door dun Butcher. Heej woj zien avonture mit de C-s efkes beej de schriever vaan deze waek onder de aandacht brenge. 70 kilomaeter, naeve de Maasdörpe. Aan ut vertrek ok wer de Jolly Joker, volledig hersteld vaan zien ritje, nao ennen aovund kaarte, mit fatale gevolge, enne gas waeke trug. Oja, en de fiets gezaegend in Grubbevôrs.
die dao de koffie vur de pausgezinde gast verzörge.
Op de beejgevoegde foto, de Krukke, ongeduldig wachtend in de cafeïnekapel op dun achtergrond, op ur waalverdinde tas koffie. Echter de zuster haai ur eigen momentje mit ur vaste lien nao ‘baove’. Ik vermoed daat dur problemen mit ut koffiezetapparaat ware en daat ze de helpdesk in dun hemel te hulp haai geroope. Of ze nag lang in de wachtreej het gestaon, zal en vraog blieve, ma de Krukke zien nao en tiedje op kouseveut vertrokke de zuster niksvermoedend achterlaotend.